In dieser Woche feiert "Blick am Abend" anlässlich des fünften Geburtstages mit einer Jubiläumswoche. Am Dienstag erschien das Blatt auf Schwiizertütsch, daher wollen wir auch dieses Interview in Mundart führen: Herr Röthlisberger, sind Ihne die foif Jahr churz oder lang vorcho?
Dia füf Johr sind wia im Flug verbii. I han z Gfühl, miar hebend erscht grad agfanga und derbi simmer schon die zweitgröschti Tagesziitig vum Land.
Durchschnittlich haltet sich d'Chefredaktore bide Blickgruppe nöd so lang uf Ihrem Sässel. Was isch Ihres Erfolgsrezäpt?
Z Huus Ringier isch z frida mit minara Arbeit. Das isch natürlich a sehr agnähms Gfühl.
Wie wänd Sie de BaA in Zuekunft na besser mache? Sind Änderige im Konzept oder im Layout vorgseh?
Miar händ jetzt grad d Helfti vu der Ziitig umbaut. Sit em Mäntig khömend d Lifestyle-Siita vollständig renoviart derhär.
Rendiert d'Gratisziitig?
Klar.
Isch es überhaupt es Ziel, dass de BaA uf eigne Bei cha stah oder muesses nur im gsamte Mediemix ufgah für Ringier?
Ds Huus Ringier isch sehr zfrida mit dem Blick am Obed. Und logisch muass jedi Ziitig rentiara.
Händ Sie idene foif Jahr mal e Uusgab nöd gläse?
Es chan si, dass i amohl an Usgab erscht wieder noch minera Rückkehr us da Feria gseh han.
Am Mäntig, isch die ganz Redaktion ufem Titelblatt abbildet gsi, dezue e Person, wo me nöd wür vo de Bettkante stosse. Sie nänned d'Romy Schneider. Welli Gschicht, oder weles Bild, hetted Sie zu Schneiders Läbziite ufs BaA-Cover gnoh?
Romy Schneider als Sissi oder als Marianne Leroy in "La Piscine".
Am Mittwuch, wird en neuiä Kolumnischt vorgschtellt. Chönd Sie eus scho chli meh über die Person verrate?
Der Siida-König Andi Stutz schriib neu für üs. Mit spitzer Fädara.
Am Dunnschtig werded diä beschte Titelblätter us foif Jahr zeigt. Was macht es guets Titelblatt us?
Es muass d Leser emotional berüara.
Welles isch Ihres persönliche Lieblingscover und warum?
"Der hässliche Deutsche" vom 17. März 2009. Well dr Blick am Obed mit däm erwaxa worda isch.
Am Fritig verteilt dRedaktion und de Verlag de BaA sälber. Wo werded Sie azträffe sii? Wie wichtig isch Ihne de persönlich Bezug zu de Läser?
D Leser gänd üs es diräkts Feedback. Das hilft üs sehr. I verteila am Bellevue in Züri.
Wie wird dInteraktion mit de Läser suscht pflägt?
Miar hend viel Kontakt mit üserna Leser via Facebook und Twitter.
Hüt, am Mittwuchabig findet die grossi Geburtstagsparty statt. Was wünschet Sie sich für Ihri Ziitig? Welli persönlich Gratulation wür Sie insbesondere freuä?
D Gratulanta findet ma alli bi üüs in der Ziitig. Mi freuend alli sehr. Und natürlich freui mi über a langs, riich erfüllts Leba für da Blick am Obed.
Interwiu: Corinne Bauer
Lesen Sie auch die persoenlich.com-Umfrage zum "Blick am Abend".
